Im dichte Schneegstöber händ sich eusi Jungs und d'Altstetter Old Devils am Fritig Abig zum ene heroische, epische Rencontre im winterlich igschneite Dolder troffe.
Ufgrund vo dä prekäre Schneeverhältnis uf dä Strasse, händ Old Devils nume grad vier Fäldspiler bi Matschbeginn chöne ufbüte. Grosszügig hämmer ne dänn drü von eusne Spiler zur Verfügig gstellt (Adi, Philipp und Stefan), damit mer überhaupt händ chöne spile. Dä Adi hämmer im Verlauf vo dä erschte Halbzit zrugg übercho, nachdems doch no eine vo dä Old Devils ufs is gschafft hät.
Am Afang isch es no einigermasse spilbar gsi, wils grad e chli weniger gschneit hät. Mir händ eus vo Afang a es klars Schanceplus erarbeitet aber s'Goal vo dä Andere isch eifach wie vernaglet gsi. Trotz höchschtkarätige Schance vo praktisch allne eusne Jungs, hämmer kein Pöck im Old Devils Gool chönne versorge und somit hät die alt Hockey-Wisheit - wer si nöd macht, chunnt si über - voll zuegschlage. D'Old Devils sind bis zur Halbzit langsam aber stetig uf 3 : 0 devo zoge.
Nach de Isreinigung hämmer dänn witerhin meh Schance gha aber immer no isch es eus nöd glunge eusi Vorteil z'nutze. De Schneefall isch zuedem immer stärcher worde und nach nume enere viertel Stund isch de Pöck zitewis under em Schnee fasch nüme z'finde gsi. Als logische Folg hät dä Schri dänn am halbi Nüni s'Spiel abbroche. Passiert isch nach dä Pause eh nüme vil, usser das zäh Manne im Schnee under vil Glächter d'Schibe im Schnee gsuecht händ.
Als Lohn für eusi Bemühige hät sich dä harti Chern dänn im Bohemia troffe, wo mer bi Bier, Nacho Chips und feine Clubsandwitsches eusi Wunde gläckt und de Misserfolg würdig zelebriert händ.
Bericht: Christian